‘I linte shtatzënë dhe i shiste fëmijët’, detaje të reja të trafikut. I përfshirë një avokat

Detaje të reja dalin në dritë pas ngjarjes së rëndë që ndodhi më 31 dhjetor 2020, ku Përparim Ademi vrau me breshëri kallashnikovi dy motrat, Zhaneta Metani dhe Kristina Bardhi.

Mediat greke bëjnë me dije se hetimet po vijojnë në vendin fqinj dhe disa dëshmi të reja kanë nxjerrë në dritë fakte rrëqethëse. Mendohet se Përparim Ademi i linte shtatzënë dy motrat dhe iu shiste fëmijët në Selanik.

Motrat qëndruan për 7 vite në Selanik (1990-1997) dhe më pas u larguan për tek motra tjetër në Kavala, por nuk i shpëtuan Përparim Ademit. Një shoqe e tyre ka zbuluar se njëherë nxori armën për t’i qëlluar dhe ato të dyja u hodhën nga dritarja për të shpëtuar.

Dyshohet se në rrjetin e shitjes së fëmijëve ishte dhe një avokat nga Tirana, por u zhduk 19 ditë para vrasjes.

Ditët e fundit, policia greke ka shkuar në qendrat e prostitucionit me fotografitë e dy motrave dhe vetëm njëra pohoi se i njihte. Sipas prostitutës, njëra nga motrat lindi një djalë në vitin 1993.