Kërcënonte me jetë punonjësin e policisë: Ti ma ke bërë…

Policia e Shtetit ka zbardhur një ngjarje të rëndë që ka të bëjë me kërcënimin e vazhdueshëm me jetë të një punonjësi të policisë. Raportohet se është arrestuar një 24-vjeçar nga Gosa e Kavajës, i cili në mënyrë të përsëtitur ka kërcënuar punonjësin e forcave blu.

Siç mëson Syri.net, autori i arrestuar është Ardit Saraçi. Ky i fundit ka kërcenuar një inspektor krimesh në Kavaje, pasi ky ka marrë pjesë në kontrollin e banesës dhe arrestimin e këtij shtetasi ne vitin 2019, i dyshuar për lëndë narkotike dhe armëmbajtje pa leje, por më vonë ka dalë me detyrim paraqitje.

Ai hapte profile në rrjete sociale dhe e kërcënonte oficerin se “ti ma ke bërë, ti ke thëne që unë kisha lëndë narkotike”.

Ja njoftimi i plotë:

Në vijim të punës për parandalimin, hetimin dhe zbardhjen e krimeve kibernetike, nga Njësia C për Hetimin e Krimeve Kibernetike në Departamentin e Policisë Kriminale në Policinë e Shtetit u zhvillua dhe finalizua me sukses operacioni policor “KËRCËNIMI”.

Pas një hetimi 6-mujor, duke vlerësuar maksimalisht situatën kriminale të krijuar, Njësia e Hetimit të Krimeve Kibernetike ka kryer hetime të plota në lidhje me kallëzimin e marrë nga një punonjës policie i cili ndihej i kërcënuar në rrjetet sociale, për shkak të detyrës, nga një shtetas i panjohur.

Pas kryerjes së hetimeve, Njësia C për Hetimin e Krimeve Kibernetike, në bashkëpunim me Prokurorinë e Rrethit Gjyqësor Kavajë ka ekzekutuar vendimin e Gjykatës së Shkallës së Parë të Rrethit Gjyqësor Kavajë për masën e sigurisë “Arrest në burg”për shtetasin:

A. S., 24 vjeç, banues në Gosë, Kavajë, me precedentë të mëparshëm kriminal, pasi dyshohet se ka konsumuar veprat penale “Falsifikimi kompjuterik” dhe “Kanosja për shkak të detyrës”.

Materiali hetimor i ndjekur nga Njësia C – Hetimi i Krimeve Kibernetike kishte të bënte me dyshime të arsyeshme se ky shtetas kishte hapur një numër të madh profilesh të rrjeteve sociale me të dhëna të rreme. Nëpërmjet mesazheve që dërgonte nga këto profile të rrjeteve sociale kanoste në mënyrë të vazhdueshme punonjësin e policisë dhe familjarët e tij, për shkak të detyrës që ky punonjës kishte kryer.

Gjatë kontrollit të banesës dhe kontrollit të këtij shtetasi, në cilësinë e provës materiale u sekuestrua një telefon celular i markës “Samsung”.

Aktualisht po punohet për zbardhjen e plotë të këtij aktiviteti kriminal dhe personat që mund të jenë të lidhur me këtë shtetas.

Materialet hetimore u dërguan në Prokurorinë, për vazhdimin e veprimeve të mëtejshme hetimore dhe procedurale