Përkujtohet në Shkodër 70 vjetori i vdekjes së Marie Tuçit. 22 vjeçarja u torturua çnjerëzisht

Bepin Kolvataj

Torturat çnjerëzore të regjimit komunist i morën jetën kur ishte vetëm 22 vjeçe.

E futur në një thes bashkë me një mace dhe ku goditej barbarisht, Marie Tuçi mbylli sytë në spitalin e Shkodrës, nga dhuna mizore vetëm sepse guxoi t’i dilte kundër sistemit.

70 vite nga dita e vdekjes së saj, Kisha Katolike në Shkodër e përkujtoi të vetmen grua mes 38 martirëve të saj.

Ipeshkvi i Rreshenit, Imzot Gjergj Meta theksoi se për të krishterët nuk ka vend hakmarrja, por asesi nuk duhet harruar e shkuara që të mos rrezikojmë të na përsëritet.

“Historia na mëson se kur harrohet, përsëritet. Ne nuk mund të harrojmë çka ka ndodhë, por kjo nuk do të thotë se duke mos harru do të vazhdojmë me urrye apo mos me dasht”, është shprehur Imzot Gjergj Meta, Ipeshkev i Rrëshenit.

Në nderim të kësaj figure u organizua edhe një konferencë në të cilën dolën në pah vlerat e Marie Tuçit si dhe prezenca e motrave stigmatinëve në Shqipëri.

“Ky momet jubilar ka qëllimin e kujtesës dhe të mirënjohjes ndaj të gjitha motrave për qëndresën e tyre besnike gjatë torturave dhe vuajtjeve që pësuan gjatë regjimit komunist”, është shprehur  motër  Dukata  Radoja.

“Njësoj si Marie Tuçi ta japim dëshminë, mos të kena frikë, mos të bahena pjesë e të keqes”, është shprehur  At Aurel Gjerkaj i Kishës Françeskane.

Për të pranishmit u prezantua libri “Shërbimi amënor i mëshirës” me autor at Pier Giorgio Taneburgo, ndërsa u shfaq dokumentari “Falenderoj zotin që po vdes e lirë”.