Sokrat i vuejtun apo derr i kenaqun

Nga Megi Bakiasi

« Gjeli këndon sot dhe thotë se është afër drita
Gjel rren a s’rren? Cila asht fjala jote?
Kur ti këndon thonë se është afër drita…
Por un s’besoj sonte në fjalët e kësaj bote. »
(Migjeni, Nji natë pa gjumë)

Mëngjesi i 17 majit nuk solli dritë për shqiptarët, por vetëm re zie dhe hidhërimi. Me duket sikur gjithë jetën janë përpjekur të na mësojnë si ti shmangeshim kësaj dite, por sot ne dështuam haptazi e me brohorima. Gjithë njerëzit që u përpoqën të na mësonin si të shfarrosnim mallkimin e tokës sonë, sot, me siguri, duan te ngrihen nga varri si Kostandini, për të na treguar se sa të zhgënjyer duhet të jenë.

Për këtë arsye mendoj se i detyrohemi këtyre njerëzve një ndjesë publike:

Konica i ndante njerëzit në dy kategori: në kombëtar, në të cilën ka shqiptarë nga të gjitha besimet, e në zuzarë… Ndjesë Faik! Zuzarët i kemi ngatërruar sot per shtetarë.

At Zef Pllumi rroi për me tregue.. Ndjesë At! Nuk patëm vesh të dëgjonim cfarë kishe per të na thënë.

Migjeni shkruan për një alternativë e na pyet shtruar: Sokrat i vuejtun apo derr i kënaqun? Ndjesë Millosh! S’ditëm ta dallonim pyetjen retorike.

Sot, të gjithë ne, duhet ti kërkojme falje mësuesve tanë të mëdhenj që u përpoqën të na paralajmëronin. Sot duhet tu kërkojmë ndjesë viktimave te burgut te Burrelit. Duhet të shkojmë te varret e tyre e t’ju kërkojmë ndjesë, se jetët e tyre te humbura nuk shërbyen per kurrgjë ; ne e lamë përbindëshin komunist të rikthehet.

Nesër në mëngjes, shqiptarët do ngrihen nga gjumi, e do shohin hijen e bustit të diktatorit ne sheshin Skënderbej, edhe pse statujë nuk duket në horizont.
Nesër në mëngjes, shqiptarët do pyesin veten: si rrëzohet një hije ?

more recommended stories

loading...