Kremtime në Romë për 100-vjetorin e themelimit të Eparkisë arbëreshe të Ungrës

Javën që vjen në Romë do të organizohen takime, kremtime e programe kushtuar jubileut të 100-vjetorit të themelimit të Eparkisë (dioqezës) arbëreshe të Ungrës, themeluar me Kushtetutën Apostolike “Catholici fideles” të Papës Benedikti XV, më 13 shkurt 1919.

Aktivitetet do të fillojnë ditën e shtunë, më 25 maj, në orën 12.00, në Vatikan, me një audiencë të veçantë të Papa Françesku me besimtarët e klerin arbëresh të Eparkisë së Ungrës dhe të gjithë arbëreshët e shqiptarët.

Eparkia a Dioqeza arbëreshe e Ungrës gjatë shekujsh pati luajtur një rol vendimtar, sepse ruajti rrënjët dhe identitetin e komunitetit shqiptar (arbëreshëve) që emigruan në Itali që në periudhën e pushtimit të Shqipërisë e të trevave shqiptare nga otomanët.

Quhen arbëreshë, pasi në kohën kur u larguan nga Shqipëria, ajo quhej Arbëri. Arbëreshët u vendosën në Itali pas vdekjes së heroit kombëtar shqiptar Gjergj Kastrioti Skënderbeu dhe pushtimit gradual të Shqipërisë dhe të gjithë Perandorisë Bizantine nga turqit osmanë. Edhe pse të larguar nga vendlindja para 600 vjetësh më parë, arbëreshët nuk e kanë harruar vendin e të parëve dhe ruajnë të gjalla, traditat e tyre të pasura si gjuhën, veshjet dhe ritet e doket që kishin në mëmëdhe.